ધુફારી

હાથમાં પકડી કલમ ઘસતા રહો,

જયાં કવિઓ હોય ત્યાં વસતા રહો;

કોઇ શું કહેશે ‘ધુફારી’પરવાહ નથી,

થાય કે ના થાય કદર લખતા રહો.

૨૨–૧૨–૨૦૧૩

–૦–

‘ધુફારીને મળે લલના તો પ્યાર આવે છે,

છતાં એ પ્યારનો તમને બુખાર આવે છે;

ભૃકુટી જો ફરે લલના તણી લાચાર એ લોકો,

મને એ જોઇને હસવું હજાર આવે છે.

૨૨–૧૨–૨૦૧૩

–૦–

ચાહે ‘ધુફારી’ આ સમય આવી મળે કોઇ સનમ,

કો મન મહીં અટવાયેલી વહેતી કરે કોઇ નઝમ;

એ નઝમ કો’ મીઠા મધુરા સુર તણા સંગાથમાં,

પડતર પડેલા શબ્દની ખેતી કરે કોઇ કલમ.

૦૪–૦૧–૨૦૧૪

Filed under: Poem |