ધુફારી

‘એમ કો’ આવે નહીં’

આભમાંથી ઉતરીને એમ કો’ આવે નહીં;

આ ધરા પર ચાંતરીને એમ કો’ આવે નહીં

છે કરમ નાયક અને આ માનવી કઠપુતળી;

એ નટોને છેતરી ને એમ કો’ આવે નહીં

આ જીવન અટવાયેલું છે કોટડી કાળી મહીં;

ભીંત એની કોતરીને એમ કો’ આવે નહીં

વાદ ને વિવાદ થાતા છે વિમાસણ કેટલી;

એ વિમાસણ વેતરીને એમ કો’ આવે નહીં

છે મધુરા બંધનો માયા અને મમતા તણાં;

એ બધાને કાતરીને એમ કો’ આવે નહીં

છે હકિકત આયના સમ ના તમે બદલી શકો;

આયનાથી વિસ્તરીને એમ કો’ આવે નહીં

વ્હેમનું ઓસડ નથી લુકમાન પાસે પણ નથી;

છે ‘ધુફારી’ ખાતરી કે એમ કો’ આવે નહીં

૨૧-૦૭-૨૦૧૫

Filed under: Poem |