ધુફારી

“સમયની વાત કર“

 

એકાંતમાં માશુક મળે એવા સમયની વાત કર;

આવ્યા પછી સંધ્યા ઢળે એવા સમયની વાત કર.

 

હર રોમથી ફૂટી કરી ખુશ્બુ ભરે આગોશને;

આલિંગતા વીટી વળે એવા સમયની વાત કર.

 

છલકાય સુરા આંખથી સાગર તણી ભરતી સમી;

પીધા વગર દિલને ચડે એવા સમયની વાત કર.

 

પ્રશ્નો હ્રદયથી ઉદભવે ને સ્પર્શથી પુછાય એ;

મૌનને ભાષા મળે એવા સમયની વાત કર.

 

દિપક પ્રકાશે પ્રેમના ચોપાસ દિલ અજવાળતા;

હર એક બિંદુ ઝળહળે એવા સમયની વાત કર.

 

સુનકારમાં ઝનકાર જાગે ને ભરે સંગિતને;

પ્રિયા “ધુફારી“ને મળે એવા સમયની વાત કર.

 

૨૩/૧૧/૨૦૦૫

Filed under: Poem |