ધુફારી

“નથી સહેલું“

 

સમયના વહેણ સામેથી તરી જાવું નથી સહેલું;

સમય પહેલા વગર પાકે ખરી જાવું નથી સહેલું.

 

બની પાગલ ભલે ફરતા રહો કો‘સુંદરી પાછળ;

વગર પ્રેમે હ્રદય એનું હરી જાવું નથી સહેલું.

 

ભલે એ ખેલ ડાબા હાથનો લાગ્યા કરે તમને;

સમય આવે એ સમજાશે કરી જાવું નથી સહેલું.

 

ભલે હો અવગુણો કેરા પુરાવા લાખ તમ પાસે;

ગુનાહિતને વદન દર્પણ ધરી જાવું નથી સહેલું.

 

જીવન છે માર્ગ ધોરી પણ છતાં એ એક માર્ગી છે;

કદમ આગળ ભર્યા પાછળ ફરી જાવું નથી સહેલું.

 

મળ્યો છે દેહ માનવનો મરી જાવા ખતમ થાવા;

“ધુફારી” કર્મ કાયાથી મરી જાવું નથી સહેલું.

 

૨૦/૦૧/૨૦૦૪

Filed under: Poem | Leave a comment »