ધુફારી

“એના એ જ છે“

 

સરતા સમયના વહેણમાં સર્જન વિસર્જન સહેલ છે;

સદીઓથી આગળ કે પછી વ્યાખ્યા પ્રણયની એ જ છે.

 

કાતિલ નજર ઘાયલ હ્રદય પહેલી નજર પણ એ જ છે;

મીઠી વિરહની મુંઝવણ ગમગીનતા પણ એ જ છે.

 

ભેદ નાતો જાતના ધર્મોના ચક્કર એ જ છે;

ધનવાન ને નિર્ધન મહીં વચ્ચે દિવાલો એ જ છે.

 

છાના મિલન એકાંતમાં ભૂલોની ભાષા એ જ છે;

ઇન્સાફ કે અન્યાયના અંજામ એના એ જ છે.

 

ઇન્કાર કે ઇકરારના શબ્દો ઇશારા એ જ છે;

કો અમર કે હો અનામી આશિકો તો એ જ છે.

 

ઓઢી કફન પોઢી ગયા દિલથી દિવાના એ જ છે;

શાકી સુરાહી ને શમા પરવાના એના એ જ છે.

 

એ જ શબ્દો એ જ ગીતો સૂર ને સરગમ એ જ છે;

જ્યાં જ્યાં “ધુફારી‘ જોય છે શાયર તો એના એ જ છે.

 

૦૨/૦૨/૨૦૦૨

Filed under: Poem |