“મેળો”(ક્ચ્છી)*
(રાગઃઆઉં ત હલા ન ભેણ નગર ભજાર……)
આઉં ત હલાં ન સજણ,એ સજણ,એ સજણ મેળે ધરાર
જખે જે મેળે અચેં,જખે જે મેળે અચેં માડુડા હજાર……..આઉં ત
રેશમજો લાલ ગવન(૨)મુકે મંગાય ડે,
ખોંભીયું મલીર મું(૨)ઉછ્યા હજાર…………………………આઉં ત
અલાચેજો કમખોને(૨)ઘાઘરો સભાય ડે,
છીંટજા છટારા(૨)મું પેરયા જમાર…………………………આઉં ત
તેલ ફૂલેલ મથે(૨) અંતરજી સીસી સજી,
કોરે આંભુડે કીં(૨)કઢાજે ન જમાર…………………………આઉં ત
હાથીજે ડંધજી(૨)ચૂડીયું મડાય ડે,
ગેંઢેજી બંગડીમું(૨)પેરૈઇ હજાર…………………………….આઉં ત
આંગરીએ વેઢ,વારી(૨)ગંઠો ને ઠોડીયા,
તેં વગર થીએ ન કડે(૨)સોઢો સણગાર…………………..આઉં ત
પગમેં રૂપેજા વેં(૨)કડલાં ને કાંભીયું,
તેં મથે જરૂર ખપે(૨)ઝાંઝર જણકાર………………………આઉં ત
હથે પગે મેંધી રખાં(૨)રતે ચોપ રંગજી,
અતરો થીએ ત હલાં(૨)મેળે ધીલધાર…………………….આઉં ત
૦૮/૦૨/૧૯૮૭
*જખ(યક્ષ બઉંતેરા)નો મેળો એ કચ્છમાં ભરાતો સૌથી મોટો છે.
Filed under: Kachchhi |
Leave a Reply